ദേവലോകം അരമനയിലേക്ക്‌ ഇന്നു യാക്കോബായ സഭയുടെ പ്രതിഷേധ മാര്‍ച്ച്‌

നീതി നിഷേധത്തിനും ഇടവക പള്ളികള്‍ കൈയേറി വിശ്വാസികളെ പുറത്താക്കുന്ന ഓര്‍ത്തഡോക്‌സ്‌ സഭാ നേതൃത്വത്തിനും എതിരേ യാക്കോബായ സഭയുടെ പ്രതിഷേധ മാര്‍ച്ച്‌ ഇന്ന്‌.

ദേവലോകം കാതോലിക്കേറ്റ്‌ അരമനയിലേക്കു നടത്തുന്ന മാര്‍ച്ചില്‍ കോട്ടയം ഭദ്രാസനത്തിലെ പതിനായിരത്തിലധികം വിശ്വാസികള്‍ അണിചേരും. ഉച്ചയ്‌ക്കു രണ്ടിനു സെന്റ്‌ ജോസഫ്‌സ്‌ കത്തീഡ്രലില്‍നിന്നു മാര്‍ച്ച്‌ ആരംഭിക്കും. ലോഗോസ്‌ ജങ്‌ഷന്‍, കെ.കെ. റോഡ്‌, കഞ്ഞിക്കുഴി വഴി ദേവലോകത്തെത്തും. സുന്നഹദോസ്‌ സെക്രട്ടറിയും കോട്ടയം ഭദ്രാസനാധിപനുമായ തോമസ്‌ മോര്‍ തിമോത്തിയോസ്‌, മെത്രാപ്പോലീത്തന്‍ ട്രസ്‌റ്റി ജോസഫ്‌ മോര്‍ ഗ്രിഗോറിയോസ്‌, ഗീവര്‍ഗീസ്‌ മോര്‍ കൂറിലോസ്‌ തുടങ്ങിയവര്‍ നേതൃത്വം നല്‍കും.

സര്‍ക്കാരിനേയും ഉദ്യോഗസ്‌ഥരേയും കോടതി വിധി തെറ്റിദ്ധരിപ്പിച്ചു കോലഞ്ചേരി, കട്ടച്ചിറ തുടങ്ങി പിറവം വരെയുള്ള ദേവാലയങ്ങളിലെ മൃഗീയ ഭൂരിപക്ഷമുള്ള സഭാംഗങ്ങളെ ഇറക്കിവിടുന്നതിനോടും മൃതശരീരത്തോടുപോലും നീതിപുലര്‍ത്താത്ത ഓര്‍ത്തഡോക്‌സ്‌ നേതൃത്വത്തിന്റെ ധാര്‍ഷ്‌ഠ്യത്തോടുമുള്ള പ്രതിഷേധമാണ്‌ ഗാന്ധിജിയുടെ ജന്മദിനമായ ഇന്നു നടത്തുന്നതെന്നു തോമസ്‌ മോര്‍ തിമോത്തിയോസും ഭദ്രാസന അല്‍മായ സെക്രട്ടറി ഷിബു പുള്ളോലിക്കലും അറിയിച്ചു.

from Southlive Malayalam: Kerala News, Malayalam News, Breaking News, Movie News, Political News https://ift.tt/2mQwana
via IFTTT