കെവിന്റെ ഓർമകൾക്ക് ഒരാണ്ട്

കോട്ടയം: കോട്ടയം നട്ടാശ്ശേരി പ്ലാത്തറയിൽ കെവിൻ പി.ജോസഫ്(24) ഓർമയായിട്ട് ഒരുവർഷം. കൊല്ലം തെന്മല സ്വദേശി നീനുവിനെ വിവാഹം കഴിച്ചതിന്, പിന്നാക്കജാതിക്കാരനായ കെവിനെ, നീനുവിന്റെ സഹോദരന്റെ നേതൃത്വത്തിൽ കൊലപ്പെടുത്തിയെന്നാണ് കേസ്. കേരളത്തിലെ ആദ്യ ദുരഭിമാനക്കൊലയാണിത്. 2018 മേയ് 27-നു പുലർച്ചെയാണ്, കെവിനെയും ബന്ധു അനീഷിനെയും മാന്നാനത്തെ അനീഷിന്റെ വീട്ടിൽനിന്നു നീനുവിന്റെ സഹോദരൻ ഷാനു ചാക്കോയുടെ നേതൃത്വത്തിൽ വാഹനത്തിൽ തട്ടിക്കൊണ്ടുപോയത്. അന്ന് ഉച്ചയോടെ കെവിനെ കാണാനില്ലെന്നു കാണിച്ച് അച്ഛൻ ജോസഫ് കോട്ടയം ഗാന്ധിനഗർ പോലീസിൽ പരാതി നൽകി. അധികം കഴിയുംമുന്പ് അനീഷ് സ്റ്റേഷനിലെത്തി. 28-നു പുലർച്ചെ പുനലൂർ ചാലിയേക്കര തോട്ടിൽനിന്നാണ് കെവിന്റെ മൃതദേഹം കണ്ടെത്തിയത്. നീനുവിന്റെ അച്ഛൻ ചാക്കോ, ഷാനു എന്നിവരുൾപ്പെടെ 14 പ്രതികളെ അറസ്റ്റുചെയ്തിട്ടുണ്ട്. കേസിന്റെ വിചാരണ നടപടികൾ പുരോഗമിക്കുകയാണ്. മൃതദേഹം കിട്ടിയതും അടക്കിയതും മേയ് 28-നായതിനാൽ ആ ദിനമാണ് ചരമവാർഷികദിനമായി കുടുംബം കണക്കാക്കുന്നത്. Content Highlights:Kevin Murder case

from mathrubhumi.latestnews.rssfeed http://bit.ly/2W7K4BG
via IFTTT